ستدرك مع الأيام أنك كنت شادهًا على الفاضي

عندك عرض بكرة؟ بعد أسبوع؟ الفكرة ما جات؟ الوضع تحت الهلع لا داعي للسيطرة؟ البكاء والعويل، والحزن الطويل ما يفيد! العملية الإبداعية يبيلها أحد بايعها، مخربها، في بطنه بطيخة صيفي، واثق بمخه، واثق بالعملية الإبداعية. خلك واثق توكل على الله وادعس… بس؟! طبعًا لا! الثقة لازم لها مصدر، مكان تشع منه، طاقة كامنة، مولّد نووي، مفاعل داخلك.

وشو هو؟ البريف + البحث. كل ما قريت البريف بدري وفهمته زيني كل ما كنت جاهزًا للانتقال للمرحلة الجاية وهي طرح الأسئلة والبحث عن الحقيقة الغايبة والأسباب. بعد ما تقفل هالشيني بذمة وإخلاص وضمير وتصير أفهم واحد في الموضوع، هنا مخك بيشتغل في الخلفية ويربط الحابل بالنابل ويسوي هوايل. بتحس براحة نفسية أنك سويت اللي تحتاجه والآن وقت أنك تسوي أشياء ثانية مثل تبدأ ترتيب العرض، تشتغل على مشروع ثاني، أو حتى تنام ملئ عينك أو تتليقف على مشاريع الجيران وتقول على قولة الشيخة غادة العسيمي "أبي ألعب معكم"، وفجأة رح تلقاك قاعد مع فريقك تفكرون وتسوون عرض ما يخرش المية.